കാര്യങ്ങള്‍

കാര്യം പറയുന്നതിലല്ല കാര്യം
കാര്യമെങ്ങനെ പറയുന്നു -
വെന്നതിലത്രേ കാര്യം .
കാര്യമാരു ചൊന്നാലും
കാര്യമായെടുക്കേണ്ടതു മാത്ര –
മെടുക്കലാണ് കാര്യം .

അറിഞ്ഞതില്‍ കാര്യമില്ലെങ്കില്‍
തലയിലേറ്റാതിരിക്കലും കാര്യം …
തലയിലേറിയ കാര്യം
ഇറക്കി വിടാതിരിക്കലും കാര്യം .

ഹരിച്ചും ഗുണിച്ചും
കാര്യമാക്കുന്ന കാര്യങ്ങള്‍
ഹിതമല്ലെങ്കില്‍ വലിച്ചെറിയുന്നതാണ്
കാര്യമെന്നറിയലാണ് കാര്യം .

കാര്യകാരണ സഹിതം
വിളമ്പുന്ന കാര്യങ്ങള്‍ ,
വെറുമൊരു നോക്കിനാല്‍
കാര്യമല്ലാതാകുമെന്നതും കാര്യം .

കാലക്കേടിന് പല ചെറു കാര്യങ്ങളും
കാലപാശമായിടുമെന്നതും കാര്യം .
കലികാലത്തെ പഴിയ്ക്കുന്നതിലല്ല കാര്യം
കലിയെങ്ങനെയീ കാലത്തെ വെല്ലുന്നുവേന്നത്
കാലഹരണപ്പെടാത്ത വലിയ കാര്യം .

കാര്യങ്ങളിങ്ങനെ ചൊല്ലിയിരുന്നാലെന്‍
കിടാങ്ങളുടെ പശി മാറീടുവാന്‍
വേറെ കാര്യം നോക്കണമെന്നത്
അതിലേറെ വലിയ കാര്യം .